saqiya ye jo tujhko ghere hain

sāqiyā ye jo tujh ko ghere haiñ

in meñ kuchh riñd kuchh luTere haiñ

apnī tahzīb khā rahī hai hameñ

saañp ke muñh meñ ḳhud sapere haiñ

jis ne baḳhshe haiñ phuul gulshan ko

us ne kuchh ḳhaar bhī bikhere haiñ

kal jo tūfān thā samundar meñ

us ke ab sāhiloñ pe Dere haiñ

tere baare meñ kuchh nahīñ ma.alūm

ham agar haiñ to sirf tere haiñ

hosh-o-ġhaflat meñ paas hī maujūd

mujh ko vo har taraf se ghere haiñ

tum se to kyā nazar milā.eñge

ḳhud se bhī ham nigāh phere haiñ

dar-haqīqat vahī adū haiñ 'falak'

jin ko kahtā hai tū ki mere haiñ

saqiya ye jo tujh ko ghere hain

in mein kuchh rind kuchh luTere hain

apni tahzib kha rahi hai hamein

sanp ke munh mein KHud sapere hain

jis ne baKHshe hain phul gulshan ko

us ne kuchh KHar bhi bikhere hain

kal jo tufan tha samundar mein

us ke ab sahilon pe Dere hain

tere bare mein kuchh nahin malum

hum agar hain to sirf tere hain

hosh-o-ghaflat mein pas hi maujud

mujh ko wo har taraf se ghere hain

tum se to kya nazar milaenge

KHud se bhi hum nigah phere hain

dar-haqiqat wahi adu hain 'falak'

jin ko kahta hai tu ki mere hain