sara badan hai KHun se kyun tar use dikha

saarā badan hai ḳhuun se kyuuñ tar use dikhā

shah-rag kaTī hai jis se vo nashtar use dikhā

aa.egī kaise niiñd dikhā vo hunar use

phir is ke ba.ad ḳhvāb ko chhū kar use dikhā

āñkhoñ se apne ashk ke tāroñ ko toḌ kar

sūkhī nadī ke dard kā manzar use dikhā

dukh-sukh jo dhuup chhāñv kā ik khel hai to phir

sūraj ke saath bādaloñ ke par use dikhā

aa.e jo koī shīshe kā paikar liye hue

to apne dasht-e-shauq meñ patthar use dikhā

pūchhe jo zindagī kī haqīqat koī 'jamāl'

to chuTkiyoñ meñ ret uḌā kar use dikhā

sara badan hai KHun se kyun tar use dikha

shah-rag kaTi hai jis se wo nashtar use dikha

aaegi kaise nind dikha wo hunar use

phir is ke baad KHwab ko chhu kar use dikha

aankhon se apne ashk ke taron ko toD kar

sukhi nadi ke dard ka manzar use dikha

dukh-sukh jo dhup chhanw ka ek khel hai to phir

suraj ke sath baadalon ke par use dikha

aae jo koi shishe ka paikar liye hue

to apne dasht-e-shauq mein patthar use dikha

puchhe jo zindagi ki haqiqat koi 'jamal'

to chuTkiyon mein ret uDa kar use dikha