سارا دن پھول پرونا چاہوں

سارا دن پھول پرونا چاہوں

اس کو خوشبو میں بھگونا چاہوں

اس کے رستے کے ہزاروں کانٹے

اپنے آنچل میں چبھونا چاہوں

آج اس راہ سے وہ گزرا ہے

آج میں فرش نہ دھونا چاہوں

اس کی پلکوں پہ جو آنسو دیکھوں

میں بھی بے ساختہ رونا چاہوں

جیسے وہ بھی ہو کوئی طفل کہ میں

اس کے ہاتھوں میں کھلونا چاہوں

اس کی بے خواب نگاہوں کی قسم

میں تو اک پل بھی نہ سونا چاہوں

دوستوں سے میں بہت واقف ہوں

پھر سے مایوس نہ ہونا چاہوں

کون پھولوں کو حمیراؔ دکھ دے

میں تو کانٹوں کا بچھونا چاہوں