sara peD hara tha us mein ek hi patta pila tha

saarā peḌ harā thā us meñ ek hī pattā piilā thā

man-pīpal ko dhuup meñ dekhā dard baḌā chamkīlā thā

us kī mastī us kī bātoñ kā maiñ zimma-dār nahīñ

maiñ kuchh aisā shoḳh nahīñ thā vo hī thoḌā nashīlā thā

puure chāñd se barsā jaadū jism nahīñ do saa.e the

hadd-e-nazar tak naqsh-e-qadam the yā phir ret kā Tiila thā

rafta-rafta miT hī gayā ḳhud us kī be-rahmī kā daaġh

yādoñ ke raushan chehre par ek nishāñ jo niilā thā

āñkhoñ ko ma.alūm nahīñ thā kitne jharne niir bahe

sub.h ko ye ehsās huā ki puurā takiya giilā thā

jis ke lams-e-tamanna par puurā īmāñ thā puurā yaqīn

kal jab us se marham māñgā us kā lahja kaTīlā thā

aaj bhī mere man ke andar koī bālak rahtā hai

tum ne dekhā us ke aage aaj bhī maiñ sharmīlā thā

sara peD hara tha us mein ek hi patta pila tha

man-pipal ko dhup mein dekha dard baDa chamkila tha

us ki masti us ki baaton ka main zimma-dar nahin

main kuchh aisa shoKH nahin tha wo hi thoDa nashila tha

pure chand se barsa jadu jism nahin do sae the

hadd-e-nazar tak naqsh-e-qadam the ya phir ret ka Tila tha

rafta-rafta miT hi gaya KHud us ki be-rahmi ka dagh

yaadon ke raushan chehre par ek nishan jo nila tha

aankhon ko malum nahin tha kitne jharne nir bahe

subh ko ye ehsas hua ki pura takiya gila tha

jis ke lams-e-tamanna par pura iman tha pura yaqin

kal jab us se marham manga us ka lahja kaTila tha

aaj bhi mere man ke andar koi baalak rahta hai

tum ne dekha us ke aage aaj bhi main sharmila tha