سارا پیڑ ہرا تھا اس میں ایک ہی پتا پیلا تھا

سارا پیڑ ہرا تھا اس میں ایک ہی پتا پیلا تھا

من پیپل کو دھوپ میں دیکھا درد بڑا چمکیلا تھا

اس کی مستی اس کی باتوں کا میں ذمہ دار نہیں

میں کچھ ایسا شوخ نہیں تھا وہ ہی تھوڑا نشیلا تھا

پورے چاند سے برسا جادو جسم نہیں دو سائے تھے

حد نظر تک نقش قدم تھے یا پھر ریت کا ٹیلہ تھا

رفتہ رفتہ مٹ ہی گیا خود اس کی بے رحمی کا داغ

یادوں کے روشن چہرے پر ایک نشاں جو نیلا تھا

آنکھوں کو معلوم نہیں تھا کتنے جھرنے نیر بہے

صبح کو یہ احساس ہوا کہ پورا تکیہ گیلا تھا

جس کے لمس تمنا پر پورا ایماں تھا پورا یقین

کل جب اس سے مرہم مانگا اس کا لہجہ کٹیلا تھا

آج بھی میرے من کے اندر کوئی بالک رہتا ہے

تم نے دیکھا اس کے آگے آج بھی میں شرمیلا تھا