sare chehre tanbe ke hain lekin sab par qali hai

saare chehre tāñbe ke haiñ lekin sab par qal.ī hai

mohmal tāba-e-mohmal kyā hai donoñ kā ik ma.anī hai

mānte haiñ aap is ke qad meñ us kā qad shāmil hī na thā

aage ham kyuuñ bahseñ sāhab itnī baat hī kaafī hai

dhaan ke khetoñ kā sab sonā kis ne churāyā kaun kahe

be-mausam be-fasl abhī tak is iz.hār kī dhartī hai

andeshe andāze ban kar mere safar ke ḳhvāb bane

har bastī meñ aa kar sochā shāyad aage bastī hai

us kī sadā se gūñge lamhe paa.el jaise bajte haiñ

bachchoñ jaisā ḳhush hotā huuñ jab bhī bārish hotī hai

be-mashshāta husn kī gaañv gaañv thā vo kahāñ gayā

bed ke sāya-zāroñ ne kab pahchān apnī khoī hai

mālik saat samundaroñ kī vus.at kā huuñ maiñ lekin

merā dil kyuuñ bhar aatā hai jab koī naddī sūkhtī hai

apne aap se maiñ sharminda hotā jo mujrim hotā

mere baare meñ ye duniyā kahne do jo kahtī hai

manzūr apne dast-e-tahī ko dekh ke tujh se pūchhe kyuuñ

harf-e-suḳhan ik tere sivā hai kaun sī shai jo sastī hai

sare chehre tanbe ke hain lekin sab par qali hai

mohmal taba-e-mohmal kya hai donon ka ek mani hai

mante hain aap is ke qad mein us ka qad shamil hi na tha

aage hum kyun bahsen sahab itni baat hi kafi hai

dhan ke kheton ka sab sona kis ne churaya kaun kahe

be-mausam be-fasl abhi tak is izhaar ki dharti hai

andeshe andaze ban kar mere safar ke KHwab bane

har basti mein aa kar socha shayad aage basti hai

us ki sada se gunge lamhe pael jaise bajte hain

bachchon jaisa KHush hota hun jab bhi barish hoti hai

be-mashshata husn ki ganw ganw tha wo kahan gaya

bed ke saya-zaron ne kab pahchan apni khoi hai

malik sat samundaron ki wusat ka hun main lekin

mera dil kyun bhar aata hai jab koi naddi sukhti hai

apne aap se main sharminda hota jo mujrim hota

mere bare mein ye duniya kahne do jo kahti hai

manzur apne dast-e-tahi ko dekh ke tujh se puchhe kyun

harf-e-suKHan ek tere siwa hai kaun si shai jo sasti hai