sare gulshan mein mera koi bhi dam-saz nahin

saare gulshan meñ mirā koī bhī dam-sāz nahīñ

chalte phirte haiñ ye saa.e magar āvāz nahīñ

ye haqīqat hai khulī is meñ koī raaz nahīñ

tū vahī hai magar aslāf ke andāz nahīñ

be-niyāz aaj bhī chashm-e-karam-andāz nahīñ

ġham na kar tū dar-e-mai-ḳhāna agar baaz nahīñ

saaz har daur meñ bante haiñ taqāzoñ ke tahat

sāz-e-hastī ho nayā phir bhī nayā saaz nahīñ

is haqīqat ko samajhte haiñ samajhne vaale

rāz-e-fitrat hai ye insān magar raaz nahīñ

hai vo is darja mukarram ki nahīñ jis kā hisāb

ḳhāliq-e-kaun-o-makāñ hai but-e-tannāz nahīñ

sar-bulandī hameñ mil saktī hai lekin ai 'ġhubār'

aaj millat ke javānoñ meñ tag-o-tāz nahīñ

sare gulshan mein mera koi bhi dam-saz nahin

chalte phirte hain ye sae magar aawaz nahin

ye haqiqat hai khuli is mein koi raaz nahin

tu wahi hai magar aslaf ke andaz nahin

be-niyaz aaj bhi chashm-e-karam-andaz nahin

gham na kar tu dar-e-mai-KHana agar baz nahin

saz har daur mein bante hain taqazon ke tahat

saz-e-hasti ho naya phir bhi naya saz nahin

is haqiqat ko samajhte hain samajhne wale

raaz-e-fitrat hai ye insan magar raaz nahin

hai wo is darja mukarram ki nahin jis ka hisab

KHaliq-e-kaun-o-makan hai but-e-tannaz nahin

sar-bulandi hamein mil sakti hai lekin ai 'ghubar'

aaj millat ke jawanon mein tag-o-taz nahin