سارے جگت کی آس تھی اس پر لگی ہوئی

سارے جگت کی آس تھی اس پر لگی ہوئی

شاید یہ آگہی کبھی بن جائے زندگی

شاید تھی راز داں مری بیتاب سوچ کی

شعر و سخن کی ایک ضیا ناچتی ہوئی

دل کے ستار پر کبھی مضراب جو لگی

لہرائی کائنات کی اک نغمگی نئی

دل کش سے اک خیال کی چنچل مہک لیے

تصویر ایک سوچ کی پیہم تھی ناچتی

نیندوں میں گم تھے جانے شکستہ سے کتنے خواب

آنکھوں میں شب کی تیرگی بیدار تھی ابھی

بے چہرگی سی اک نئی چہروں پہ تھی لیے

شام و سحر یہ بھیڑ کہیں بھاگتی ہوئی

کس پیکر جمال کا تھا انتظار آج

پلکوں پہ ہم سجائے تھے شبنم کی پالکی

مہماں تھا کون رات شبستان شوق میں

مچلی ہوئی رگوں میں تھی چاہت نئی نئی

یہ گیسوؤں کی چھاؤں یہ دل کش بدن کی دھوپ

اس دھوپ‌ چھاؤں میں ہی ملی ایک تازگی