sare jagat ki aas thi is par lagi hui

saare jagat kī aas thī is par lagī huī

shāyad ye āgahī kabhī ban jaa.e zindagī

shāyad thī rāzdāñ mirī betāb soch kī

she’r-o-suḳhan kī ek ziyā nāchtī huī

dil ke sitār par kabhī mizrāb jo lagī

lahrā.ī kā.enāt kī ik naġhmagī na.ī

dilkash se ik ḳhayāl kī chanchal mahak liye

tasvīr ek soch kī paiham thī nāchtī

nīñdoñ meñ gum the jaane shikasta se kitne ḳhvāb

āñkhoñ meñ shab kī tīrgī bedār thī abhī

be-chehragī sī ik na.ī chehroñ pe thī liye

shām-o-sahar ye bhiiḌ kahīñ bhāgtī huī

kis paikar-e-jamāl kā thā intizār aaj

palkoñ pe ham sajā.e the shabnam kī pālkī

mehmāñ thā kaun raat shabistān-e-shauq meñ

machlī huī ragoñ meñ thī chāhat na.ī na.ī

ye gesūoñ kī chhāñv ye dilkash badan kī dhuup

is dhūp-chhāñv meñ hī milī ek tāzgī

sare jagat ki aas thi is par lagi hui

shayad ye aagahi kabhi ban jae zindagi

shayad thi raazdan meri betab soch ki

she’r-o-suKHan ki ek ziya nachti hui

dil ke sitar par kabhi mizrab jo lagi

lahrai kaenat ki ek naghmagi nai

dilkash se ek KHayal ki chanchal mahak liye

taswir ek soch ki paiham thi nachti

nindon mein gum the jaane shikasta se kitne KHwab

aankhon mein shab ki tirgi bedar thi abhi

be-chehragi si ek nai chehron pe thi liye

sham-o-sahar ye bhiD kahin bhagti hui

kis paikar-e-jamal ka tha intizar aaj

palkon pe hum sajae the shabnam ki palki

mehman tha kaun raat shabistan-e-shauq mein

machli hui ragon mein thi chahat nai nai

ye gesuon ki chhanw ye dilkash badan ki dhup

is dhup-chhanw mein hi mili ek tazgi