sare manzar dilkash the har baat suhani lagti thi

saare manzar dilkash the har baat suhānī lagtī thī

jīvan kī har shaam hameñ tab ek kahānī lagtī thī

jis kā chāñd sā chehrā thā aur zulf sunahrī bādal sī

mast havā kā āñchal thāme ek divānī lagtī thī

apne ḳhvāb na.e lagte the aur phir un ke aage sab

duniyā aur zamāne kī har baat purānī lagtī thī

pyaar ke mausam kī ḳhushbū se ġhuncha ġhuncha mahkā thā

mahkī mahkī duniyā saarī raat kī raanī lagtī thī

lamhoñ ke rañgīn ġhubāre haath se chhūTe jaate the

mausam dukh kā dard kī rut sab ānī-jānī lagtī thī

qaus-e-quzah kī bārish meñ ye jazboñ kī muñh zor havā

mauj uḌāte bal khāte dariyā kī ravānī lagtī thī

ab dekheñ to duur kahīñ par yādoñ kī phulvārī meñ

rañgoñ se bharpūr fazā thī jo lāfānī lagtī thī

sare manzar dilkash the har baat suhani lagti thi

jiwan ki har sham hamein tab ek kahani lagti thi

jis ka chand sa chehra tha aur zulf sunahri baadal si

mast hawa ka aanchal thame ek diwani lagti thi

apne KHwab nae lagte the aur phir un ke aage sab

duniya aur zamane ki har baat purani lagti thi

pyar ke mausam ki KHushbu se ghuncha ghuncha mahka tha

mahki mahki duniya sari raat ki rani lagti thi

lamhon ke rangin ghubare hath se chhuTe jate the

mausam dukh ka dard ki rut sab aani-jaani lagti thi

qaus-e-quzah ki barish mein ye jazbon ki munh zor hawa

mauj uDate bal khate dariya ki rawani lagti thi

ab dekhen to dur kahin par yaadon ki phulwari mein

rangon se bharpur faza thi jo lafani lagti thi