sare zaKHmon ko zaban mil gai gham bolte hain

saare zaḳhmoñ ko zabāñ mil ga.ī ġham bolte haiñ

ham magar zarf se majbūr haiñ kam bolte haiñ

kis qadar toḌ diyā hai use ḳhāmoshī ne

koī bole vo samajhtā hai ki ham bolte haiñ

kyā ajab log the guzre haiñ baḌī shaan ke saath

rāste chup haiñ magar naqsh-e-qadam bolte haiñ

vaqt vo hai ki ḳhudā ḳhair, ba-nām-e-īmāñ

dair vāloñ kī zabāñ ahl-e-haram bolte haiñ

kahte haiñ zarf kā saudā nahīñ karte ham log

kis qadar jhuuT ye sab ahl-e-qalam bolte haiñ

kahīñ rahte haiñ dar-o-bām nadāmat se ḳhamosh

bikhrī īñToñ meñ kahīñ jāh-o-hasham bolte haiñ

baat bhī karte haiñ ehsān jatāne kī tarah

kaise lahje meñ ye ab ahl-e-karam bolte haiñ

kaun ye pursish-e-ahvāl ko aayā 'tāriq'

lab haiñ ḳhāmosh magar dīda-e-nam bolte haiñ

sare zaKHmon ko zaban mil gai gham bolte hain

hum magar zarf se majbur hain kam bolte hain

kis qadar toD diya hai use KHamoshi ne

koi bole wo samajhta hai ki hum bolte hain

kya ajab log the guzre hain baDi shan ke sath

raste chup hain magar naqsh-e-qadam bolte hain

waqt wo hai ki KHuda KHair, ba-nam-e-iman

dair walon ki zaban ahl-e-haram bolte hain

kahte hain zarf ka sauda nahin karte hum log

kis qadar jhuT ye sab ahl-e-qalam bolte hain

kahin rahte hain dar-o-baam nadamat se KHamosh

bikhri inTon mein kahin jah-o-hasham bolte hain

baat bhi karte hain ehsan jatane ki tarah

kaise lahje mein ye ab ahl-e-karam bolte hain

kaun ye pursish-e-ahwal ko aaya 'tariq'

lab hain KHamosh magar dida-e-nam bolte hain