sari bazm-e-talab tumhaari hai

saarī bazm-e-talab tumhārī hai

din tumhārā hai shab tumhārī hai

shāḳh-e-jāñ pe ye pyaar kī shabnam

pahle merī thī ab tumhārī hai

merī sāñsoñ meñ vasl kī ḳhushbū

jitnī hai sab kī sab tumhārī hai

ye jo ik be-ḳhudī kā dariyā hai

is meñ mauj-e-tarab tumhārī hai

sochtī huuñ ki ye badan kī mahak

kab nahīñ aur kab tumhārī hai

nashsha-e-chashm-o-lab tumhārā hai

shāḳh-e-bint-e-inab tumhārī hai

raushnī mahtāb se baḌh kar

dil meñ shāh-e-arab tumhārī hai

tum ne sochā hai ye kabhī 'afroz'

zindagī be-sabab tumhārī hai

sari bazm-e-talab tumhaari hai

din tumhaara hai shab tumhaari hai

shaKH-e-jaan pe ye pyar ki shabnam

pahle meri thi ab tumhaari hai

meri sanson mein wasl ki KHushbu

jitni hai sab ki sab tumhaari hai

ye jo ek be-KHudi ka dariya hai

is mein mauj-e-tarab tumhaari hai

sochti hun ki ye badan ki mahak

kab nahin aur kab tumhaari hai

nashsha-e-chashm-o-lab tumhaara hai

shaKH-e-bint-e-inab tumhaari hai

raushni mahtab se baDh kar

dil mein shah-e-arab tumhaari hai

tum ne socha hai ye kabhi 'afroz'

zindagi be-sabab tumhaari hai