sath chal paDi tanha sath rah gai tanha

saath chal paḌī tanhā saath rah ga.ī tanhā

kitnī bā-vafā niklī merī bebasī tanhā

vaqt phir mehrbāñ hai kaT ga.e sabhī sāthī

zindagī kī rāhoñ meñ rah gayā koī tanhā

aap kī navāzish hai aap kī tavajjoh se

sargirāñ hai barsoñ se ek ajnabī tanhā

ye junūñ kī pābandī ye ḳhirad kī ta.azīreñ

kis tarah nibāhegī ek zindagī tanhā

har taraf musallat hai ik muhīb sannāTā

haañ magar dhaḌaktā hai dil kabhī kabhī tanhā

'anjum'-e-shikasta ne mai-kade se kyā paayā

ek jaam TuuTā sā ek tishnagī tanhā

sath chal paDi tanha sath rah gai tanha

kitni ba-wafa nikli meri bebasi tanha

waqt phir mehrban hai kaT gae sabhi sathi

zindagi ki rahon mein rah gaya koi tanha

aap ki nawazish hai aap ki tawajjoh se

sargiran hai barson se ek ajnabi tanha

ye junun ki pabandi ye KHirad ki taziren

kis tarah nibahegi ek zindagi tanha

har taraf musallat hai ek muhib sannaTa

han magar dhaDakta hai dil kabhi kabhi tanha

'anjum'-e-shikasta ne mai-kade se kya paya

ek jam TuTa sa ek tishnagi tanha