sath chalte ja rahe hain pas aa sakte nahin

saath chalte jā rahe haiñ paas aa sakte nahīñ

ik nadī ke do kināroñ ko milā sakte nahīñ

dene vaale ne diyā sab kuchh 'ajab andāz se

sāmne duniyā paḌī hai aur uThā sakte nahīñ

us kī bhī majbūriyāñ haiñ merī bhī majbūriyāñ

roz milte haiñ magar ghar meñ batā sakte nahīñ

kis ne kis kā naam īñToñ par likhā hai ḳhuun se

ishtihāroñ se ye dīvāreñ chhupā sakte nahīñ

raaz jab siine se bāhar ho gayā apnā kahāñ

ret par bikhre hue aañsū uThā sakte nahīñ

aadmī kyā hai guzarte vaqt kī tasvīr hai

jaane vaale ko sadā de kar bulā sakte nahīñ

shahr meñ rahte hue ham ko zamāna ho gayā

kaun rahtā hai kahāñ kuchh bhī batā sakte nahīñ

us kī yādoñ se mahakne lagtā hai saarā badan

pyaar kī ḳhushbū ko siine meñ chhupā sakte nahīñ

pattharoñ ke bartanoñ meñ āñsuoñ ko kyā rakheñ

phuul ko lafzoñ ke gamloñ meñ khilā sakte nahīñ

sath chalte ja rahe hain pas aa sakte nahin

ek nadi ke do kinaron ko mila sakte nahin

dene wale ne diya sab kuchh 'ajab andaz se

samne duniya paDi hai aur uTha sakte nahin

us ki bhi majburiyan hain meri bhi majburiyan

roz milte hain magar ghar mein bata sakte nahin

kis ne kis ka nam inTon par likha hai KHun se

ishtihaaron se ye diwaren chhupa sakte nahin

raaz jab sine se bahar ho gaya apna kahan

ret par bikhre hue aansu uTha sakte nahin

aadmi kya hai guzarte waqt ki taswir hai

jaane wale ko sada de kar bula sakte nahin

shahr mein rahte hue hum ko zamana ho gaya

kaun rahta hai kahan kuchh bhi bata sakte nahin

us ki yaadon se mahakne lagta hai sara badan

pyar ki KHushbu ko sine mein chhupa sakte nahin

pattharon ke bartanon mein aansuon ko kya rakhen

phul ko lafzon ke gamlon mein khila sakte nahin