sath ghairon ke hai sada gaT-paT

saath ġhairoñ ke hai sadā gaT-paT

ik hamīñ se rakhe hai dil meñ kapaT

chañgul-e-bāz haiñ tirī mizhgāñ

tā.ir-e-dil ko pal meñ le hai jhapaT

terī is vaz-e-dil-rubā.ī se

ghar ke ghar ho ga.e haiñ chūḌ-chapaT

vo bhī din phir dikhā.egā allāh

raat ko so.e tū gale se lipaT

paas jab ġhair ko biThātā hai

jaa.e hai dil tire milāp se haT

dete ho baat baat meñ baazī

ek ho apne kaam ke naT-khaT

naaz kī teġh ġhair par mat khīñch

dil hamārā kahīñ na jaave kaT

jis tarah chāñd par ho abr-e-siyāh

zulf yuuñ mukhḌe par rahī hai ulaT

iid hai aaj aa gale mil leñ

dushmanoñ kī to jaa.e chhātī phaT

ġham meñ tere haiñ ashk yuuñ jaarī

har ghaḌī jis tarah chale hai rahaT

ishq vo ghar hai jis ke shāh-o-gadā

bā-adab chūmte rahe chaukhaT

kulle-shai-in-muhīt kī taqrīr

khaT se insān ke hue parghaT

dil-e-bechāra ik tan-e-tanhā

fauj-e-ġham aa.e hai tamām simaT

dost kī ho madad to yak dam meñ

jaa.e ye ma.arka tamām palaT

yaañ qadam raah par sivā.e na rakh

ai 'muhib' raah ishq kī hai bikaT

sath ghairon ke hai sada gaT-paT

ek hamin se rakhe hai dil mein kapaT

changul-e-baz hain teri mizhgan

tair-e-dil ko pal mein le hai jhapaT

teri is waz-e-dil-rubai se

ghar ke ghar ho gae hain chuD-chapaT

wo bhi din phir dikhaega allah

raat ko soe tu gale se lipaT

pas jab ghair ko biThata hai

jae hai dil tere milap se haT

dete ho baat baat mein bazi

ek ho apne kaam ke naT-khaT

naz ki tegh ghair par mat khinch

dil hamara kahin na jawe kaT

jis tarah chand par ho abr-e-siyah

zulf yun mukhDe par rahi hai ulaT

id hai aaj aa gale mil len

dushmanon ki to jae chhati phaT

gham mein tere hain ashk yun jari

har ghaDi jis tarah chale hai rahaT

ishq wo ghar hai jis ke shah-o-gada

ba-adab chumte rahe chaukhaT

kulle-shai-in-muhit ki taqrir

khaT se insan ke hue parghaT

dil-e-bechaara ek tan-e-tanha

fauj-e-gham aae hai tamam simaT

dost ki ho madad to yak dam mein

jae ye marka tamam palaT

yan qadam rah par siwae na rakh

ai 'muhib' rah ishq ki hai bikaT