sath le kar apni barbaadi ke afsane gae

saath le kar apnī barbādī ke afsāne ga.e

ābrū-e-anjuman the jo vo dīvāne ga.e

ibtidā ye thī ki duniyā bhar kī nazreñ ham pe thiiñ

intihā ye hai ki ḳhud se bhī na pahchāne ga.e

terī fayyāzī se kab inkār hai saaqī magar

aise mai-kash bhī haiñ kuchh jin tak na paimāne ga.e

mahfileñ mahkī huī thiiñ jin se vo gul kyā hue

shāyad ab vo gosha-e-turbat ko mahkāne ga.e

dūsroñ ke ġham meñ rotī thiiñ jo sham.eñ bujh ga.iiñ

aag meñ ġhairoñ kī jalte the jo parvāne ga.e

tishnagī se zarf ko ai sāqi-e-mahfil na tol

uTh ga.e to umr-bhar ko phir ye dīvāne ga.e

mashvare to aql bhī detī rahī 'rāhī' magar

dil ne jo farmā.e the vo faisle maane ga.e

sath le kar apni barbaadi ke afsane gae

aabru-e-anjuman the jo wo diwane gae

ibtida ye thi ki duniya bhar ki nazren hum pe thin

intiha ye hai ki KHud se bhi na pahchane gae

teri fayyazi se kab inkar hai saqi magar

aise mai-kash bhi hain kuchh jin tak na paimane gae

mahfilen mahki hui thin jin se wo gul kya hue

shayad ab wo gosha-e-turbat ko mahkane gae

dusron ke gham mein roti thin jo shamen bujh gain

aag mein ghairon ki jalte the jo parwane gae

tishnagi se zarf ko ai saqi-e-mahfil na tol

uTh gae to umr-bhar ko phir ye diwane gae

mashware to aql bhi deti rahi 'rahi' magar

dil ne jo farmae the wo faisle mane gae