sath mein aghyar ke main bhi saf-e-maqtal mein hun

saath meñ aġhyār ke maiñ bhī saf-e-maqtal meñ huuñ

sūrat-e-tarkīb-e-mauzūñ misra-e-mohmal meñ huuñ

mujh sā rañgīñ-tab.a hai tīra-darūnoñ meñ ḳharāb

maiñ sharāb-e-arġhavānī huuñ magar botal meñ huuñ

gand-hā-e-nā-tarāshīda haiñ ham sohbat mirī

in dinoñ to maiñ bhī ḳhushbū kī tarah sandal meñ huuñ

aadmī be-his-o-mas maiñ sūrat-e-mardum giyāh

shahr meñ huuñ maiñ ilāhī yā kisī jañgal meñ huuñ

parda-dār-e-girya-e-be-iḳhtiyārī faqr hai

barq hai abr-e-siyah meñ aur maiñ kammal meñ huuñ

hāsil-e-nekī huuñ nekoñ ko badoñ ko bad huuñ 'mehr'

merā hī partav anat meñ hai maiñ hī hanzal meñ huuñ

sath mein aghyar ke main bhi saf-e-maqtal mein hun

surat-e-tarkib-e-mauzun misra-e-mohmal mein hun

mujh sa rangin-taba hai tira-darunon mein KHarab

main sharab-e-arghawani hun magar botal mein hun

gand-ha-e-na-tarashida hain hum sohbat meri

in dinon to main bhi KHushbu ki tarah sandal mein hun

aadmi be-his-o-mas main surat-e-mardum giyah

shahr mein hun main ilahi ya kisi jangal mein hun

parda-dar-e-girya-e-be-iKHtiyari faqr hai

barq hai abr-e-siyah mein aur main kammal mein hun

hasil-e-neki hun nekon ko badon ko bad hun 'mehr'

mera hi partaw anat mein hai main hi hanzal mein hun