satwen number ki surat wo bhi pur-asrar tha

sātveñ number kī sūrat vo bhī pur-asrār thā

maiñ sifar kī tarah sab kuchh thā magar be-kār thā

har-nafas ab tak mire dil kī ajab hālat rahī

maut se Dartā bhī thā jiine se bhī bezār thā

ik shanāsā nā-shanāsā.ī thī mere har taraf

merā ghar mere liye to ghar na thā bāzār thā

merī barbādī kā zāmin dūsrā koī nahīñ

maiñ ki apne vāhimoñ kā aap zimmedār thā

jism hī kyā ruuh tak zaḳhmoñ se chhalnī ho ga.ī

saañs kā rishta na thā chaltī huī talvār thā

ab bhalā hāsil bhī kyā hogā ba-juz sharmindagī

kyā kahūñ 'shādāb' kis se barsar-e-paikār thā

satwen number ki surat wo bhi pur-asrar tha

main sifar ki tarah sab kuchh tha magar be-kar tha

har-nafas ab tak mere dil ki ajab haalat rahi

maut se Darta bhi tha jine se bhi bezar tha

ek shanasa na-shanasai thi mere har taraf

mera ghar mere liye to ghar na tha bazar tha

meri barbaadi ka zamin dusra koi nahin

main ki apne wahimon ka aap zimmedar tha

jism hi kya ruh tak zaKHmon se chhalni ho gai

sans ka rishta na tha chalti hui talwar tha

ab bhala hasil bhi kya hoga ba-juz sharmindagi

kya kahun 'shadab' kis se barsar-e-paikar tha