ساونی رم جھم بھی ہے باد صبا ہے شاعری

ساونی رم جھم بھی ہے باد صبا ہے شاعری

بانسری کی تان طوطی کی صدا ہے شاعری

جگنوؤں کی دب دباہٹ چاند تاروں کی چمک

آسماں پر کہکشاں کا دائرہ ہے شاعری

رنگ وہ قوس قزح کے اور جھرنوں کا وہ سر

سبز وادی میں غزالوں کی ادا ہے شاعری

برف کی چادر میں لپٹے کوہسار و سبزہ زار

چاندنی میں گرتے جھرنوں کی صدا ہے شاعری

پھول کی خوشبو چمن کا حسن بھنوروں کا وہ شور

پھوٹتے چشموں سے کل کل کی صدا ہے شاعری

یہ صدا شاعر کے دل کی یہ مغنی کی صدا

حسن کا انداز عاشق کی وفا ہے شاعری

شاعری کو مختصر کر دوں تو بس اتنا کہوں

ہیر ہے رانجھا ہے یہ عشق و وفا ہے شاعری