sawani rim-jhim bhi hai baad-e-saba hai shairi

sāvanī rim-jhim bhī hai bād-e-sabā hai shā'irī

bāñsurī kī taan tuutī kī sadā hai shā'irī

jugnuoñ kī dab-dabāhaT chāñd tāroñ kī chamak

āsmāñ par kahkashāñ kā dā.era hai shā'irī

rang vo qaus-e-quzah ke aur jharnoñ kā vo sur

sabz vaadī meñ ġhazāloñ kī adā hai shā'irī

barf kī chādar meñ lipTe kohsār o sabza-zār

chāñdnī meñ girte jharnoñ kī sadā hai shā'irī

phuul kī ḳhushbū chaman kā husn bhañvaroñ kā vo shor

phūTte chashmoñ se kal kal kī sadā hai shā'irī

ye sadā shā'ir ke dil kī ye muġhannī kī sadā

husn kā andāz 'āshiq kī vafā hai shā'irī

shā'irī ko muḳhtasar kar duuñ to bas itnā kahūñ

hiir hai rāñjhā hai ye 'ishq-o-vafā hai shā'irī

sawani rim-jhim bhi hai baad-e-saba hai sha'iri

bansuri ki tan tuti ki sada hai sha'iri

jugnuon ki dab-dabahaT chand taron ki chamak

aasman par kahkashan ka daera hai sha'iri

rang wo qaus-e-quzah ke aur jharnon ka wo sur

sabz wadi mein ghazalon ki ada hai sha'iri

barf ki chadar mein lipTe kohsar o sabza-zar

chandni mein girte jharnon ki sada hai sha'iri

phul ki KHushbu chaman ka husn bhanwaron ka wo shor

phuTte chashmon se kal kal ki sada hai sha'iri

ye sada sha'ir ke dil ki ye mughanni ki sada

husn ka andaz 'ashiq ki wafa hai sha'iri

sha'iri ko muKHtasar kar dun to bas itna kahun

hir hai ranjha hai ye 'ishq-o-wafa hai sha'iri