saya-e-zulm sar-e-KHalq-e-KHuda hota hai

sāya-e-zulm sar-e-ḳhalq-e-ḳhudā hotā hai

jab bhī parcham shab-e-yaldā kā khulā hotā hai

jānte bhī haiñ ki hai zulm kī bālā-dastī

ye bhī kahte haiñ ki bandoñ kā ḳhudā hotā hai

rāt-bhar jāgne vāloñ ne batāyā hai hameñ

rāt-bhar shahr kā darvāza khulā hotā hai

vahī parkār-e-jafā aur vahī qirtās-e-vatan

dā.era jabr kā har samt khiñchā hotā hai

ab to ye haal huā hai ki har ik raste par

raah roke hue ik rāh-numā hotā hai

nisbat-e-ahd-e-guzishta se ba-qaul-e-'ġhālib'

roz is shahr meñ ik hukm nayā hotā hai

sab samajhte haiñ 'munīr' aur kahe jaate haiñ

kuchh samajh meñ nahīñ aatā hai ki kyā hotā hai

saya-e-zulm sar-e-KHalq-e-KHuda hota hai

jab bhi parcham shab-e-yalda ka khula hota hai

jaante bhi hain ki hai zulm ki baala-dasti

ye bhi kahte hain ki bandon ka KHuda hota hai

raat-bhar jagne walon ne bataya hai hamein

raat-bhar shahr ka darwaza khula hota hai

wahi parkar-e-jafa aur wahi qirtas-e-watan

daera jabr ka har samt khincha hota hai

ab to ye haal hua hai ki har ek raste par

rah roke hue ek rah-numa hota hai

nisbat-e-ahd-e-guzishta se ba-qaul-e-'ghaalib'

roz is shahr mein ek hukm naya hota hai

sab samajhte hain 'munir' aur kahe jate hain

kuchh samajh mein nahin aata hai ki kya hota hai