سایہ ہے تری زلف کا یہ رات بڑی ہے

سایہ ہے تری زلف کا یہ رات بڑی ہے

اک جلوۂ رخ دے کہ تری بات بڑی ہے

اک جلوۂ رخ دے کہ اندھیری ہے بڑی رات

کٹنے کو تو کٹ جائے گی گو رات بڑی ہے

آنسو کو نہ دیکھو کہ ہے عکس دل پر خوں

دامن پہ سنبھالو کہ یہ سوغات بڑی ہے

وہ شعر ہو کہ نالہ و آہ دل مظلوم

جو بات سر دار ہے وہ بات بڑی ہے

وہ شاہ کہ با حلقۂ اسپ و رخ و فرزیں

کھا جائے اگر مات تو وہ مات بڑی ہے

ہر جبر پہ ہر ظلم پر اک صبر جفا نوش

یہ جستجوئے روز مکافات بڑی ہے

کیا دوست کہ اب منہ بھی لگاتے نہیں دشمن

سالکؔ یہ سمجھتا ہے کہ اوقات بڑی ہے