saya hai teri zulf ka ye raat baDi hai

saaya hai tirī zulf kā ye raat baḌī hai

ik jalva-e-ruḳh de ki tirī baat baḌī hai

ik jalva-e-ruḳh de ki añdherī hai baḌī raat

kaTne ko to kaT jā.egī go raat baḌī hai

aañsū ko na dekho ki hai aks-e-dil-e-pur-ḳhūñ

dāman pe sa.mbhālo ki ye sauġhāt baḌī hai

vo sher ho ki nāla-o-āh-e-dil-e-mazlūm

jo baat sar-e-dār hai vo baat baḌī hai

vo shaah ki bā-halqa-e-asp-o-ruḳh-o-farzīñ

khā jaa.e agar maat to vo maat baḌī hai

har jabr pe har zulm par ik sabr-e-jafā-nosh

ye justujū-e-roz-e-mukāfāt baḌī hai

kyā dost ki ab muñh bhī lagāte nahīñ dushman

'sālik' ye samajhtā hai ki auqāt baḌī hai

saya hai teri zulf ka ye raat baDi hai

ek jalwa-e-ruKH de ki teri baat baDi hai

ek jalwa-e-ruKH de ki andheri hai baDi raat

kaTne ko to kaT jaegi go raat baDi hai

aansu ko na dekho ki hai aks-e-dil-e-pur-KHun

daman pe sambhaalo ki ye saughat baDi hai

wo sher ho ki nala-o-ah-e-dil-e-mazlum

jo baat sar-e-dar hai wo baat baDi hai

wo shah ki ba-halqa-e-asp-o-ruKH-o-farzin

kha jae agar mat to wo mat baDi hai

har jabr pe har zulm par ek sabr-e-jafa-nosh

ye justuju-e-roz-e-mukafat baDi hai

kya dost ki ab munh bhi lagate nahin dushman

'salik' ye samajhta hai ki auqat baDi hai