saya paDte hi zamin ka mah par

saaya paḌte hī zamīñ kā maah par

chal paḌe sab dahriyat kī raah par

bārhā us ko kiyā āgāh par

dil kisī sūrat na aayā raah par

ye bhī dekhā hai hamārī nasl ne

kaT ga.e sar kitne ik afvāh par

haiñ jo asrār-e-zamīñ se nā-balad

tabsira karte haiñ mehr-o-māh par

reza reza ho gayā rishtoñ kā pul

jo Tikā thā sirf rasm-o-rāh par

ham suḳhan-dānoñ ko māl-o-zar se kyā

ham to bak jaate haiñ sirf ik vaah par

ik ishāra to zarā karte kabhī

jaan de dete tumhārī chaah par

jītnī baazī hai jo shatranj kī

rakh nigāheñ har ghaḌī tū shaah par

kyoñ kisī ke aage phailā.ūñ maiñ haath

merā īmāñ hai mire allāh par

kaan koī kyoñ nahīñ dhartā yahāñ

'shād' is dil se nikaltī aah par

saya paDte hi zamin ka mah par

chal paDe sab dahriyat ki rah par

barha us ko kiya aagah par

dil kisi surat na aaya rah par

ye bhi dekha hai hamari nasl ne

kaT gae sar kitne ek afwah par

hain jo asrar-e-zamin se na-balad

tabsira karte hain mehr-o-mah par

reza reza ho gaya rishton ka pul

jo Tika tha sirf rasm-o-rah par

hum suKHan-danon ko mal-o-zar se kya

hum to bak jate hain sirf ek wah par

ek ishaara to zara karte kabhi

jaan de dete tumhaari chah par

jitni bazi hai jo shatranj ki

rakh nigahen har ghaDi tu shah par

kyon kisi ke aage phailaun main hath

mera iman hai mere allah par

kan koi kyon nahin dharta yahan

'shad' is dil se nikalti aah par