saya qadam qadam pe hai har raushni ke sath

saaya qadam qadam pe hai har raushnī ke saath

sub.heñ chhupī haiñ parde meñ har tīrgī ke saath

āsān kar dī tere tasavvur ne manzileñ

guzre rah-e-hayāt se ham be-ḳhudī ke saath

sajde dil-o-nazar ke to har jā bikhar ga.e

dair-o-haram kā kaam hī kyā bandagī ke saath

ik dard thā ki bazm se le kar terī chale

dil yaañ ki vaañ luTā ke chale ham ḳhushī ke saath

terī nigāh-e-nāz ke qurbān jā.iye

lapkā hai dil meñ sho.ala magar dilkashī ke saath

terī talab meñ dār-o-rasan se guzar ga.e

khelā hai ham ne khel koī zindagī ke saath

sāġhar meñ apnī āñkhoñ kī mastī bhī ghol de

mai bhī do-ātishāñ ho tirī dilbarī ke saath

fitne se kam nahīñ hai bigaḌnā tirā magar

nikhrā hai husn aur bhī kuchh barhamī ke saath

apnā banā ke yuuñ mujhe chhoḌā hai raah meñ

do-gām jaise koī chale ajnabī ke saath

ai shikva-sanj terā hī dāman nahīñ vasī.a

kyā ne.amateñ 'habīb' milīñ zindagī ke saath

saya qadam qadam pe hai har raushni ke sath

subhen chhupi hain parde mein har tirgi ke sath

aasan kar di tere tasawwur ne manzilen

guzre rah-e-hayat se hum be-KHudi ke sath

sajde dil-o-nazar ke to har ja bikhar gae

dair-o-haram ka kaam hi kya bandagi ke sath

ek dard tha ki bazm se le kar teri chale

dil yan ki wan luTa ke chale hum KHushi ke sath

teri nigah-e-naz ke qurban jaiye

lapka hai dil mein shoala magar dilkashi ke sath

teri talab mein dar-o-rasan se guzar gae

khela hai hum ne khel koi zindagi ke sath

saghar mein apni aankhon ki masti bhi ghol de

mai bhi do-atishan ho teri dilbari ke sath

fitne se kam nahin hai bigaDna tera magar

nikhra hai husn aur bhi kuchh barhami ke sath

apna bana ke yun mujhe chhoDa hai rah mein

do-gam jaise koi chale ajnabi ke sath

ai shikwa-sanj tera hi daman nahin wasia

kya neamaten 'habib' milin zindagi ke sath