saz-e-dil par gungunane ka zamana aa gaya

sāz-e-dil par gungunāne kā zamāna aa gayā

aa gayā piine pilāne kā zamāna aa gayā

pai-ba-pai sāġhar lunḌhāne kā zamāna aa gayā

har qadam par laḌkhaḌāne kā zamāna aa gayā

phir kisī kī yaad dil meñ chuTkiyāñ lene lagī

phir taḌapne tilmilāne kā zamāna aa gayā

phir kisī ke āstāñ par le chalā zauq-e-sujūd

har qadam par sar jhukāne kā zamāna aa gayā

miT gayā shauq-e-talab meñ sar-basar ehsās-e-ġham

mushkiloñ par muskurāne kā zamāna aa gayā

hai pas-e-parda jamāl-e-dil-nashīñ jalva-fagan

dīda-o-dil āzmāne kā zamāna aa gayā

mil ga.ī arz-e-tamannā kī ijāzat mil ga.ī

harf-e-matlab bhuul jaane kā zamāna aa gayā

saz-e-dil par gungunane ka zamana aa gaya

aa gaya pine pilane ka zamana aa gaya

pai-ba-pai saghar lunDhane ka zamana aa gaya

har qadam par laDkhaDane ka zamana aa gaya

phir kisi ki yaad dil mein chuTkiyan lene lagi

phir taDapne tilmilane ka zamana aa gaya

phir kisi ke aastan par le chala zauq-e-sujud

har qadam par sar jhukane ka zamana aa gaya

miT gaya shauq-e-talab mein sar-basar ehsas-e-gham

mushkilon par muskurane ka zamana aa gaya

hai pas-e-parda jamal-e-dil-nashin jalwa-fagan

dida-o-dil aazmane ka zamana aa gaya

mil gai arz-e-tamanna ki ijazat mil gai

harf-e-matlab bhul jaane ka zamana aa gaya