saz-e-dil tishna-e-mizrab-e-tamanna na raha

sāz-e-dil tishna-e-mizrāb-e-tamannā na rahā

dīda-e-shauq tamāshā hai tamāshā na rahā

dil rahā dil meñ magar josh-e-tamannā na rahā

anjuman rah ga.ī aur anjuman-ārā na rahā

hai vahī tuur vahī barq vahī shān-e-jamāl

haañ koī aag se ab khelne vaalā na rahā

dāman-e-mauj bhī hāthoñ se chhuTā jaatā hai

Dūbne vaale ko tinke kā sahārā na rahā

aaj vo sar tire qadmoñ pe jhukā jaatā hai

jo haram meñ bhī kabhī nāsiya-farsā na rahā

yak-ba-yak yuuñ na sar-e-bazm uThānī thī naqāb

jalve betāb haiñ aur dekhne vaalā na rahā

rah ga.ī aañkh bhī kuchh ashk bahā kar ḳhāmosh

ya.anī dil qābil-e-iz.hār-e-tamannā na rahā

dil kahīñ thā kahīñ nazreñ thiiñ ḳhayālāt kahīñ

maiñ rahā bazm meñ is tarah ki goyā na rahā

muzhda-e-vasl sunā kar bhī use dekh liyā

tirā dīvāna har ik haal meñ dīvāna rahā

yuuñ to har ek se kahte the fasāna dil kā

us ne jab pūchhā to phir kahne kā yaarā na rahā

phir bhī kuchh dil ko tasallī sī to hotī hai 'munīr'

go kabhī muntazir-e-va.ada-e-fardā na rahā

saz-e-dil tishna-e-mizrab-e-tamanna na raha

dida-e-shauq tamasha hai tamasha na raha

dil raha dil mein magar josh-e-tamanna na raha

anjuman rah gai aur anjuman-ara na raha

hai wahi tur wahi barq wahi shan-e-jamal

han koi aag se ab khelne wala na raha

daman-e-mauj bhi hathon se chhuTa jata hai

Dubne wale ko tinke ka sahaara na raha

aaj wo sar tere qadmon pe jhuka jata hai

jo haram mein bhi kabhi nasiya-farsa na raha

yak-ba-yak yun na sar-e-bazm uThani thi naqab

jalwe betab hain aur dekhne wala na raha

rah gai aankh bhi kuchh ashk baha kar KHamosh

yani dil qabil-e-izhaar-e-tamanna na raha

dil kahin tha kahin nazren thin KHayalat kahin

main raha bazm mein is tarah ki goya na raha

muzhda-e-wasl suna kar bhi use dekh liya

tera diwana har ek haal mein diwana raha

yun to har ek se kahte the fasana dil ka

us ne jab puchha to phir kahne ka yara na raha

phir bhi kuchh dil ko tasalli si to hoti hai 'munir'

go kabhi muntazir-e-wada-e-farda na raha