saz hathon mein uThao to ghazal pesh karun

saaz hāthoñ meñ uThāo to ġhazal pesh karūñ

tum nazar mujh se milāo to ġhazal pesh karūñ

ye hai paiġhām-e-mohabbat ise chhup kar na suno

tum mire sāmne aao to ġhazal pesh karūñ

duur hī duur jalāo na mohabbat ke charāġh

raushnī ban ke tum aao to ġhazal pesh karūñ

tanhā tanhā sī nazar aatī hai duniyā merī

tum mire paas jo aao to ġhazal pesh karūñ

bārhā tum ne satāyā hai mujhe raat aur din

mujh ko itnā na satāo to ġhazal pesh karūñ

ham haiñ vo ishq ke panchhī jo ġhazal kahte haiñ

tum ġhazal mujh ko sunāo to ġhazal pesh karūñ

tum ko chāhā hai tah-e-dil se yaqīnan ham ne

tum mire dil meñ samāo to ġhazal pesh karūñ

jhūTe va.adoñ se tasallī nahīñ miltī hai 'tarun'

sachchā ā.īna dikhāo to ġhazal pesh karūñ

saz hathon mein uThao to ghazal pesh karun

tum nazar mujh se milao to ghazal pesh karun

ye hai paigham-e-mohabbat ise chhup kar na suno

tum mere samne aao to ghazal pesh karun

dur hi dur jalao na mohabbat ke charagh

raushni ban ke tum aao to ghazal pesh karun

tanha tanha si nazar aati hai duniya meri

tum mere pas jo aao to ghazal pesh karun

barha tum ne sataya hai mujhe raat aur din

mujh ko itna na satao to ghazal pesh karun

hum hain wo ishq ke panchhi jo ghazal kahte hain

tum ghazal mujh ko sunao to ghazal pesh karun

tum ko chaha hai tah-e-dil se yaqinan hum ne

tum mere dil mein samao to ghazal pesh karun

jhuTe wadon se tasalli nahin milti hai 'tarun'

sachcha aaina dikhao to ghazal pesh karun