سب آگ ظاہری تھی دلوں میں لگی نہ تھی

سب آگ ظاہری تھی دلوں میں لگی نہ تھی

مجھ کو بھی کب جنوں تھا اگر وہ پری نہ تھی

حسرت ملال درد تڑپ خواب آرزو

اک کارواں تھا ساتھ مرے بس وہی نہ تھی

وہ دشت انتشار میں ایسا غزال تھا

نافہ سے جس کے مشک ابھی تک اڑی نہ تھی

پھر یہ ہوا کہ دونوں جدا ہو گئے مگر

اس کو بھی تھا ملال مجھے بھی خوشی نہ تھی

سوچا تو ایک ابر کا ٹکڑا برس گیا

دیکھا تو دور دور ہوا میں نمی نہ تھی

دنیا تو دوستی پہ رضامند تھی ضیاؔ

پر کیا کریں کہ خود سے مری دشمنی نہ تھی