sab chehron par ek hi rang aur sab aankhon mein ek hi KHwab

sab chehroñ par ek hī rañg aur sab āñkhoñ meñ ek hī ḳhvāb

phir bhī jaane bastī bastī maqtal kyuuñ hai shahr-e-gulāb

vahshat-e-bām-o-dar kahtī hai aur balā.eñ ā.eñgī

ab jo balā.eñ aa.iiñ to logo ran hogā be-hadd-o-hisāb

jab bhī kabhī shab-ḳhūn paḌā to ahl-e-chaman ḳhāmosh rahe

mausam-e-gul meñ jis ko dekho ''merī shāḳheñ'' ''mere gulāb''

ham se koī pūchhe to batā.eñ kyā kuchh ham par biit ga.ī

kahāñ kahāñ gahnā.e sūraj kahāñ kahāñ Duube mahtāb

aao sham.eñ sab gul kar do kah do jaane vaale jaa.eñ

ab har din paikār kā din hai ab har din hai roz-e-hisāb

pyaas kī bāteñ kahte sunte kitne mausam aa.e ga.e

koī sabīl-e-koh-kanī bhī kab tak zikr-e-qaht-e-āb

ham be-dar be-ghar logoñ kī ek duā bas ek duā

mālik shahr-e-gulāb salāmat ham par jo bhī aa.e azaab

sab chehron par ek hi rang aur sab aankhon mein ek hi KHwab

phir bhi jaane basti basti maqtal kyun hai shahr-e-gulab

wahshat-e-baam-o-dar kahti hai aur balaen aaengi

ab jo balaen aain to logo ran hoga be-hadd-o-hisab

jab bhi kabhi shab-KHun paDa to ahl-e-chaman KHamosh rahe

mausam-e-gul mein jis ko dekho meri shaKHen mere gulab

hum se koi puchhe to bataen kya kuchh hum par bit gai

kahan kahan gahnae suraj kahan kahan Dube mahtab

aao shamen sab gul kar do kah do jaane wale jaen

ab har din paikar ka din hai ab har din hai roz-e-hisab

pyas ki baaten kahte sunte kitne mausam aae gae

koi sabil-e-koh-kani bhi kab tak zikr-e-qaht-e-ab

hum be-dar be-ghar logon ki ek dua bas ek dua

malik shahr-e-gulab salamat hum par jo bhi aae azab