sab dam-ba-KHud hain nabz ki raftar dekh kar

sab dam-ba-ḳhud haiñ nabz kī raftār dekh kar

tum hañs rahe ho hālat-e-bīmār dekh kar

saudā vo kyā karegā ḳharīdār dekh kar

ghabrā gayā jo garmī-e-bāzār dekh kar

allāh tere haath hai ab ābrū-e-shauq

dam ghuT rahā hai vaqt kī raftār dekh kar

detā kahāñ hai vaqt paḌe par koī bhī saath

ham ko musībatoñ meñ giraftār dekh kar

aate haiñ mai-kade kī taraf se janāb-e-shaiḳh

sargoshiyāñ haiñ laġhzish-e-raftār dekh kar

ġhairoñ ne ġhair jaan ke ham ko uThā diyā

baiThe jahāñ bhī sāya-e-dīvār dekh kar

aate hī bazm-e-yār meñ pahchān hī gayā

mai-ḳhvār kī nigāh ko mai-ḳhvār dekh kar

is madh-bharī nigāh kī allāh se kashish

sau baar dekhnā paḌā ik baar dekh kar

tum rahnumā-e-vaqt sahī phir bhī chand gaam

chalnā paḌegā vaqt kī raftār dekh kar

vaqt-e-sahar guzar ga.ī kyā kyā na pūchhiye

gardan meñ un kī sūkhe hue haar dekh kar

talchhaT milā ke detā hai rindoñ ko sāqiyā

sāġhar paTak na de koī hushiyār dekh kar

'bismil' ko kyā hai chādar-e-rahmat rasūl kī

saa.e meñ le hī legī gunahgār dekh kar

sab dam-ba-KHud hain nabz ki raftar dekh kar

tum hans rahe ho haalat-e-bimar dekh kar

sauda wo kya karega KHaridar dekh kar

ghabra gaya jo garmi-e-bazar dekh kar

allah tere hath hai ab aabru-e-shauq

dam ghuT raha hai waqt ki raftar dekh kar

deta kahan hai waqt paDe par koi bhi sath

hum ko musibaton mein giraftar dekh kar

aate hain mai-kade ki taraf se janab-e-shaiKH

sargoshiyan hain laghzish-e-raftar dekh kar

ghairon ne ghair jaan ke hum ko uTha diya

baiThe jahan bhi saya-e-diwar dekh kar

aate hi bazm-e-yar mein pahchan hi gaya

mai-KHwar ki nigah ko mai-KHwar dekh kar

is madh-bhari nigah ki allah se kashish

sau bar dekhna paDa ek bar dekh kar

tum rahnuma-e-waqt sahi phir bhi chand gam

chalna paDega waqt ki raftar dekh kar

waqt-e-sahar guzar gai kya kya na puchhiye

gardan mein un ki sukhe hue haar dekh kar

talchhaT mila ke deta hai rindon ko saqiya

saghar paTak na de koi hushiyar dekh kar

'bismil' ko kya hai chadar-e-rahmat rasul ki

sae mein le hi legi gunahgar dekh kar