sab daraKHt Khaali hain barishon ke mausam mein

sab daraḳht ḳhālī haiñ bārishoñ ke mausam meñ

saare ghar muqaffal haiñ vasvasoñ ke mausam meñ

āñdhiyoñ kī bārish meñ sab charāġh zinda haiñ

jāgtā hai yazdāñ bhī rat-jagoñ ke mausam meñ

aap se shikāyat kyā aap se gila kaisā

phir rahā huuñ ḳhud tanhā sāzishoñ ke mausam meñ

jāgte daraḳhtoñ kī shāḳh shāḳh ḳhālī hai

koī phal ugegā to ḳhvāhishoñ ke mausam meñ

abr kā koī TukḌā shahr bhar savālī hai

aañkh ḳhushk dariyā hai āñsuoñ ke mausam meñ

bas isī tajassus meñ raat kā safar guzrā

kaun hai jo rotā hai chāhatoñ ke mausam meñ

ik sukūt taarī hai har sadā ke chehre par

pā-barahna lamhe haiñ sā.atoñ ke mausam meñ

sab daraKHt KHali hain barishon ke mausam mein

sare ghar muqaffal hain waswason ke mausam mein

aandhiyon ki barish mein sab charagh zinda hain

jagta hai yazdan bhi rat-jagon ke mausam mein

aap se shikayat kya aap se gila kaisa

phir raha hun KHud tanha sazishon ke mausam mein

jagte daraKHton ki shaKH shaKH KHali hai

koi phal ugega to KHwahishon ke mausam mein

abr ka koi TukDa shahr bhar sawali hai

aankh KHushk dariya hai aansuon ke mausam mein

bas isi tajassus mein raat ka safar guzra

kaun hai jo rota hai chahaton ke mausam mein

ek sukut tari hai har sada ke chehre par

pa-barahna lamhe hain saaton ke mausam mein