sab hain muhtaj faqat ek KHuda deta hai

sab haiñ muhtāj faqat ek ḳhudā detā hai

maañg ke dekh vo dāman se sivā detā hai

dil to phir dil hai vo patthar ko jalā detā hai

jis ko chhū detā hai ā.īna banā detā hai

maiñ ki vīrāne meñ ik phuul khilāne se rahā

vo ki sahrā ko bhī gulzār banā detā hai

dil vo pāgal hai ki rotā hai to rote rote

qatra-e-ashk kā ambār lagā detā hai

phūñs kā ghar hai mire gaañv ke andar sab kā

bujhte sho.aloñ ko yahāñ kaun havā detā hai

mujh ko angūr kī beTī se vo hāsil na huā

terī āñkhoñ kā tasavvur jo nasha detā hai

sar hathelī pe liye qasd-e-safar lāzim hai

hausla sū-e-yaqīñ baḌh ke sadā detā hai

tham ga.ī nabz mirī saañs kī lai lauT ga.ī

chārāgar chhoḌ de bekār davā detā hai

raag dīpak meñ sunātā hai ġhazal jab 'anjum'

apnī āvāz se vo aag lagā detā hai

sab hain muhtaj faqat ek KHuda deta hai

mang ke dekh wo daman se siwa deta hai

dil to phir dil hai wo patthar ko jala deta hai

jis ko chhu deta hai aaina bana deta hai

main ki virane mein ek phul khilane se raha

wo ki sahra ko bhi gulzar bana deta hai

dil wo pagal hai ki rota hai to rote rote

qatra-e-ashk ka ambar laga deta hai

phuns ka ghar hai mere ganw ke andar sab ka

bujhte shoalon ko yahan kaun hawa deta hai

mujh ko angur ki beTi se wo hasil na hua

teri aankhon ka tasawwur jo nasha deta hai

sar hatheli pe liye qasd-e-safar lazim hai

hausla su-e-yaqin baDh ke sada deta hai

tham gai nabz meri sans ki lai lauT gai

chaaragar chhoD de bekar dawa deta hai

rag dipak mein sunata hai ghazal jab 'anjum'

apni aawaz se wo aag laga deta hai