سب جھوٹ ہے اس دشت میں جو کچھ بھی جہاں ہے

سب جھوٹ ہے اس دشت میں جو کچھ بھی جہاں ہے

تپتی ہوئی رتیلی زمیں آب رواں ہے

خود بن کے بگڑ جاتا ہوں منڈلاتی ہوا میں

پہچان مری ہے نہ کوئی نام و نشاں ہے

تقسیم جواہر نے تماشہ وہ دکھایا

تا حد نظر زیر فلک صرف دھواں ہے

یہ کون سی بستی ہے تہہ خاک تمنا

ہر آنکھ جہاں نم ہے ہر اک چہرہ دھواں ہے

اک رنگ کہ بکھرا ہے در و بام پہ ہر سو

اک گردش حالات کہ آنکھوں سے عیاں ہے

ہاں جس کی تجلی سے ہر اک ذرہ ہے روشن

وہ آپ پس پردۂ افلاک نہاں ہے