سب جو کرتے ہیں وہی کر جائیں کیا

سب جو کرتے ہیں وہی کر جائیں کیا

شہر ہی میں گھر کوئی بنوائیں کیا

دوستوں سے دشمنی کرتے نہیں

دشمنوں کو جا کے یہ سمجھائیں کیا

جیسا کل تھا آج وہ ویسا نہیں

دشت میں مجنوں سے ملنے جائیں کیا

دل میں جو بھی ہے وہ کہہ دو صاف صاف

بک رہے ہو آئیں بائیں شائیں کیا

بھولنا عادت میں شامل آپ کی

پھر انہیں باتوں کو ہم دہرائیں کیا

جتنا ہم سے ہو سکا ہم نے کیا

زندگی تو ہی بتا مر جائیں کیا

ہے محبت اور مروت چپ جو ہیں

آپ کی ہر بات کو ٹھکرائیں کیا

ہے کہاں تعبیر کی صورت کوئی

خواب ہی بس دیکھتے رہ جائیں کیا

کچھ کہو یہ چاہتے ہیں لوگ سب

تم یہ کہتے ہو کہ ہم فرمائیں کیا