sab kahte hain dekh usko sar-e-rah zamin par

sab kahte haiñ dekh us ko sar-e-rāh zamīñ par

''kis raah se aayā ye utar maah zamīñ par''

bīmār kī tere to kahānī hai baḌī par

qissa hai ab ik dam meñ hī kotāh zamīñ par

tū chhat pe chaḌhā us ke hai aisā ki bas āḳhir

chhoḌegī utarvā ke tirī chaah zamīñ par

ye vo dil-e-muztar hai ki juuñ barq-e-tapīda

gaahe ba-falak aa.e nazar gaah zamīñ par

kuchh soch ke bas kāñpne lagtā huuñ maiñ 'jur.at'

paḌtā hai qadam zor se jab aah zamīñ par

sab kahte hain dekh us ko sar-e-rah zamin par

kis rah se aaya ye utar mah zamin par

bimar ki tere to kahani hai baDi par

qissa hai ab ek dam mein hi kotah zamin par

tu chhat pe chaDha us ke hai aisa ki bas aaKHir

chhoDegi utarwa ke teri chah zamin par

ye wo dil-e-muztar hai ki jun barq-e-tapida

gahe ba-falak aae nazar gah zamin par

kuchh soch ke bas kanpne lagta hun main 'jurat'

paDta hai qadam zor se jab aah zamin par