سب کے دکھ میں شامل ہو کر سب کا ہونا پڑتا ہے

سب کے دکھ میں شامل ہو کر سب کا ہونا پڑتا ہے

اپنی ہستی کو پانے میں خود کو کھونا پڑتا ہے

الجھن کے سنگ بیٹھے بیٹھے پہروں رونا پڑتا ہے

اس کی چاہت دل میں رکھ کے اس کا ہونا پڑتا ہے

ساحل پر ہی بیٹھے بیٹھے سوچو چاہے جو لیکن

ساگر سے ملنے کی خاطر دریا ہونا پڑتا ہے

شہرت کی بہکی راہوں سے تم بھی گھر آ جاؤ گے

دن ڈھلتے ہی سورج کو بھی جا کر سونا پڑتا ہے

ہم پھولوں سے چہرے والے مرہم جیسی طبیعت ہے

زخموں کی خاطر تو بھائی نشتر ہونا پڑتا ہے