sab ke ghamon mein thoDi thoDi maine hisse-dari ki

sab ke ġhamoñ meñ thoḌī thoḌī maiñ ne hisse-dārī kī

ḳhushiyoñ kī ummīd na rakkhī dard se rishta-dārī kī

duniyā vāloñ kī aadat hai ye to dikhāvā karte haiñ

maiñ ne sab ko apnā samjhā duniyā ne makkārī kī

sab masrūf the koī na aayā haal mirā sunñe ke liye

shahr meñ yuuñ to phail ga.ī thī ḳhabar mirī bīmārī kī

zālim raat bahut bhārī thī āñkhoñ par kyā kyā guzrī

sub.h kī aahaT sun kar shab ne chalne kī tayyārī kī

āñdhī ne vo zulm hai Dhāyā shāḳh jo TuuTī bikhre phuul

TuuTe patte dekh ḳhizāñ ne apnī rā.e-shumārī kī

is ke bachche us kī ḳhidmat meñ din raat lage haiñ aaj

jis ne buzurgoñ kī ḳhidmat kī jis ne tābedārī kī

tārīkī meñ Duub gayā thā chāñd kā raushan chehra jab

saarī raat charāġhoñ ne ghuT ghuT kar āh-o-zārī kī

apne savāloñ se ghabrā kar sab ḳhud hī ro dete the

chāhne vāloñ ne āñkhoñ meñ shab bhar shab-bedārī kī

us zālim ne haal na pūchhā jis se thī ummīd bahut

sab ne yuuñ to rasm nibhā.ī sab ne duniyā-dārī kī

ye shāyad apnī qismat hai is se shikāyat kyā karnā

jis ko ham ne dil se chāhā us ne dil-āzārī kī

sab ke ghamon mein thoDi thoDi main ne hisse-dari ki

KHushiyon ki ummid na rakkhi dard se rishta-dari ki

duniya walon ki aadat hai ye to dikhawa karte hain

main ne sab ko apna samjha duniya ne makkari ki

sab masruf the koi na aaya haal mera sunne ke liye

shahr mein yun to phail gai thi KHabar meri bimari ki

zalim raat bahut bhaari thi aankhon par kya kya guzri

subh ki aahaT sun kar shab ne chalne ki tayyari ki

aandhi ne wo zulm hai Dhaya shaKH jo TuTi bikhre phul

TuTe patte dekh KHizan ne apni rae-shumari ki

is ke bachche us ki KHidmat mein din raat lage hain aaj

jis ne buzurgon ki KHidmat ki jis ne tabedari ki

tariki mein Dub gaya tha chand ka raushan chehra jab

sari raat charaghon ne ghuT ghuT kar aah-o-zari ki

apne sawalon se ghabra kar sab KHud hi ro dete the

chahne walon ne aankhon mein shab bhar shab-bedari ki

us zalim ne haal na puchha jis se thi ummid bahut

sab ne yun to rasm nibhai sab ne duniya-dari ki

ye shayad apni qismat hai is se shikayat kya karna

jis ko hum ne dil se chaha us ne dil-azari ki