سب کے گھر میں یہ چراغاں نہیں دیکھا جاتا

سب کے گھر میں یہ چراغاں نہیں دیکھا جاتا

جز ترے کوئی بھی شاداں نہیں دیکھا جاتا

کیا کہیں یہ غم دوراں نہیں دیکھا جاتا

ہجر کا چاند فروزاں نہیں دیکھا جاتا

ہم ہیں مجنوں کے پرستار میاں ہم سے تو

سونا سونا یہ بیاباں نہیں دیکھا جاتا

ہم وفاؤں کا تقاضہ نہیں کرتے اس سے

ہم سے وہ شخص پشیماں نہیں دیکھا جاتا

میں تو صابر ہوں کبھی اف نہیں کرتا لیکن

یار ہم راہ رقیباں نہیں دیکھا جاتا

دل میں رونق تو رہے تو نہ سہی اور سہی

اب تو خالی یہ خمستاں نہیں دیکھا جاتا

آ ترے حق میں دعا کر دوں اے دشمن میرے

مجھ سے اب تو بھی پریشاں نہیں دیکھا جاتا

شہر والے تو یہ کہہ کہہ کے ترس کھاتے ہیں

ایسا برباد سخنداں نہیں دیکھا جاتا

اتنا تاریک ہے یہ دور ہمارا حمزہؔ

اب کوئی صاحب عرفاں نہیں دیکھا جاتا