sab ke ghar mein ye charaghan nahin dekha jata

sab ke ghar meñ ye charāġhāñ nahīñ dekhā jaatā

juz tire koī bhī shādāñ nahīñ dekhā jaatā

kyā kaheñ ye ġham-e-daurāñ nahīñ dekhā jaatā

hijr kā chāñd farozāñ nahīñ dekhā jaatā

ham haiñ majnūñ ke parastār miyāñ ham se to

suunā suunā ye bayābāñ nahīñ dekhā jaatā

ham vafāoñ kā taqāza nahīñ karte us se

ham se vo shaḳhs pashemāñ nahīñ dekhā jaatā

maiñ to sābir huuñ kabhī uf nahīñ kartā lekin

yaar hamrāh-e-raqībāñ nahīñ dekhā jaatā

dil meñ raunaq to rahe tū na sahī aur sahī

ab to ḳhālī ye ḳhumistāñ nahīñ dekhā jaatā

aa tire haq meñ du'ā kar duuñ ai dushman mere

mujh se ab tū bhī pareshāñ nahīñ dekhā jaatā

shahr vaale to ye kah kah ke taras khāte haiñ

aisā barbād suḳhan-dāñ nahīñ dekhā jaatā

itnā tārīk hai ye daur hamārā 'hamza'

ab koī sāhib-e-‘irfāñ nahīñ dekhā jaatā

sab ke ghar mein ye charaghan nahin dekha jata

juz tere koi bhi shadan nahin dekha jata

kya kahen ye gham-e-dauran nahin dekha jata

hijr ka chand farozan nahin dekha jata

hum hain majnun ke parastar miyan hum se to

suna suna ye bayaban nahin dekha jata

hum wafaon ka taqaza nahin karte us se

hum se wo shaKHs pasheman nahin dekha jata

main to sabir hun kabhi uf nahin karta lekin

yar hamrah-e-raqiban nahin dekha jata

dil mein raunaq to rahe tu na sahi aur sahi

ab to KHali ye KHumistan nahin dekha jata

aa tere haq mein du'a kar dun ai dushman mere

mujh se ab tu bhi pareshan nahin dekha jata

shahr wale to ye kah kah ke taras khate hain

aisa barbaad suKHan-dan nahin dekha jata

itna tarik hai ye daur hamara 'hamza'

ab koi sahib-e-‘irfan nahin dekha jata