sab ke hathon mein aaj patthar hai

sab ke hāthoñ meñ aaj patthar hai

aur nishāne pe bas mirā sar hai

kaash aakar zarā koī dekhe

qābil-e-dīd kitnā manzar hai

aisī ḳhūbī hai jaane kyā us meñ

dekh le jis ko vo musahhar hai

but-shikan naam jis kā hai mash.hūr

ik payambar hai ibn-e-āzar hai

ab to jaa.e amaañ kahīñ bhī nahīñ

āfatoñ kā pahāḌ sar par hai

jal ga.e dhuup kī tamāzat se

sā.ebāñ hai na koī chhappar hai

jism uryāñ hai baal bikhre hue

ghar se bāhar ye kis kī duḳhtar hai

shauq se sangsār ho jā.ūñ

jurm koī agar mire sar hai

ho sake to zarā simaT jaao

paañv phailāo jitnī chādar hai

kyoñ jhukā.ūñ maiñ sar kahīñ jā kar

mire sar ke liye tirā dar hai

jā ke masjid meñ dekh le ai 'yās'

adnā a.alā vahāñ barābar hai

sab ke hathon mein aaj patthar hai

aur nishane pe bas mera sar hai

kash aakar zara koi dekhe

qabil-e-did kitna manzar hai

aisi KHubi hai jaane kya us mein

dekh le jis ko wo musahhar hai

but-shikan nam jis ka hai mashhur

ek payambar hai ibn-e-azar hai

ab to jae aman kahin bhi nahin

aafaton ka pahaD sar par hai

jal gae dhup ki tamazat se

saeban hai na koi chhappar hai

jism uryan hai baal bikhre hue

ghar se bahar ye kis ki duKHtar hai

shauq se sangsar ho jaun

jurm koi agar mere sar hai

ho sake to zara simaT jao

panw phailao jitni chadar hai

kyon jhukaun main sar kahin ja kar

mere sar ke liye tera dar hai

ja ke masjid mein dekh le ai 'yas'

adna aala wahan barabar hai