sab ki sab kya hain shab-e-qadr hamari raaten

sab kī sab kyā haiñ shab-e-qadr hamārī rāteñ

kaTtī haiñ āñkhoñ hī meñ hijr kī saarī rāteñ

haa.e kyā pyaar se sote the lipaT kar ai jaan

yaad har dam mujhe aatī haiñ vo pyārī rāteñ

donoñ zulfoñ meñ haiñ ḳhurshed se tābāñ aariz

roz-e-raushan ke barābar haiñ tumhārī rāteñ

jo ghaḌī hai nazar aatī hai mujhe ek pahāḌ

haiñ ġhazab furqat-e-mahbūb kī bhārī rāteñ

hijr meñ sub.h se tā-shām bajā.e shabnam

merī āñkhoñ se lahū rakhtī haiñ jaarī rāteñ

sun paḌe rahte haiñ be-yār añdhere meñ ham

haiñ shab-e-gor ke mānind hamārī rāteñ

shab-e-tārīk judā.ī meñ ye chillātā huuñ

diq bahut kartī haiñ yā-hazrat-e-bārī rāteñ

terī zulfoñ ke liye shāna-ba-kaf hai har din

aur kartī haiñ tirī ā.īna-dārī rāteñ

fasl-e-gul meñ vo gul-e-tar nahīñ gul kar de charāġh

ki siyah chāhiyeñ ai bād-e-bahārī rāteñ

murġh-e-zarrīn-e-falak par hai yaqīn-e-ḳhuffāsh

kis qadar mere dinoñ meñ huiiñ saarī rāteñ

din ke badle bhī yahī aatī haiñ ġham-ḳhvārī ko

mujh se rakhtī haiñ bahut hijr meñ yaarī rāteñ

din to 'nāsiḳh' ke ba-har-hāl guzar jaate haiñ

par judā.ī meñ bahut laatī haiñ ḳhvārī bāteñ

sab ki sab kya hain shab-e-qadr hamari raaten

kaTti hain aankhon hi mein hijr ki sari raaten

hae kya pyar se sote the lipaT kar ai jaan

yaad har dam mujhe aati hain wo pyari raaten

donon zulfon mein hain KHurshed se taban aariz

roz-e-raushan ke barabar hain tumhaari raaten

jo ghaDi hai nazar aati hai mujhe ek pahaD

hain ghazab furqat-e-mahbub ki bhaari raaten

hijr mein subh se ta-sham bajae shabnam

meri aankhon se lahu rakhti hain jari raaten

sun paDe rahte hain be-yar andhere mein hum

hain shab-e-gor ke manind hamari raaten

shab-e-tarik judai mein ye chillata hun

diq bahut karti hain ya-hazrat-e-bari raaten

teri zulfon ke liye shana-ba-kaf hai har din

aur karti hain teri aaina-dari raaten

fasl-e-gul mein wo gul-e-tar nahin gul kar de charagh

ki siyah chahiyen ai baad-e-bahaari raaten

murgh-e-zarrin-e-falak par hai yaqin-e-KHuffash

kis qadar mere dinon mein huin sari raaten

din ke badle bhi yahi aati hain gham-KHwari ko

mujh se rakhti hain bahut hijr mein yari raaten

din to 'nasiKH' ke ba-har-haal guzar jate hain

par judai mein bahut lati hain KHwari baaten