sab ko dekha sab ko parkha koi nahin

sab ko dekhā sab ko parkhā koī nahīñ

tum jo ho jaise ho aisā koī nahīñ

be-vajah kis uljhan meñ paḌ jaate ho

tum achchhe ho tum se achchhā koī nahīñ

jab tak tum the ghar meñ kaisī raunaq thī

barsoñ biite aatā jaatā koī nahīñ

kahne ko ye bhī vo bhī sab apne haiñ

mar jā.ūñ to rone vaalā koī nahīñ

sab se rishta joḌ ke maiñ ne dekh liyā

tere alāva sach hai merā koī nahīñ

be-shak ham sab allah hī ke bande haiñ

lekin ham meñ allah vaalā koī nahīñ

kyā kyā ruup badal kar dhokā detī hai

duniyā jis kā apnā chehra koī nahīñ

kal tak jhūTī shohrat par jo zinda the

miTTī ho ga.e jānñe vaalā koī nahīñ

sab ko dekha sab ko parkha koi nahin

tum jo ho jaise ho aisa koi nahin

be-wajah kis uljhan mein paD jate ho

tum achchhe ho tum se achchha koi nahin

jab tak tum the ghar mein kaisi raunaq thi

barson bite aata jata koi nahin

kahne ko ye bhi wo bhi sab apne hain

mar jaun to rone wala koi nahin

sab se rishta joD ke main ne dekh liya

tere alawa sach hai mera koi nahin

be-shak hum sab allah hi ke bande hain

lekin hum mein allah wala koi nahin

kya kya rup badal kar dhoka deti hai

duniya jis ka apna chehra koi nahin

kal tak jhuTi shohrat par jo zinda the

miTTi ho gae jaanne wala koi nahin