sab ko hai manzur us ruKHsar-e-gul-gun ki taraf

sab ko hai manzūr us ruḳhsār-e-gul-gūñ kī taraf

dekhtā hai kaun merī chashm-e-pur-ḳhūñ kī taraf

saath naaqa ke ḳhudā jaane kidhar ram kar ga.ī

gard-e-mahmil bhī na pahuñchī aah majnūñ kī taraf

jān-o-dil meñ be-tarah bigḌī hai tere ishq meñ

kījiye dil kī taraf yā jān-e-mahzūñ kī taraf

zulf-o-ruḳh hai roz-o-shab kyā dekhte rahte ho tum

munsifī se Tuk to dekho apne maftūñ kī taraf

ḳhizr tak kiijo madad tū bhī ki tā bhūle na raah

nāqa-e-lailā chalā hai aaj majnūñ kī taraf

garche haiñ terī hī gardish se nigah kī ham ḳharāb

par ishāra is kā kar dete haiñ gardūñ kī taraf

kyūñki aave chain tere vahshiyoñ ko ba.ad-e-marg

ḳhaak ho kar jab talak jāveñ na hāmūñ kī taraf

naam meñ bhī hai ayaañ āshiq kī āshufta-sarī

dekhte to hoge aksar bed-e-majnūñ kī taraf

bas-ki us kī zulf ke āshufta haiñ ham ai 'hasan'

sher meñ bhī dhyān hai pechīda mazmūñ kī taraf

sab ko hai manzur us ruKHsar-e-gul-gun ki taraf

dekhta hai kaun meri chashm-e-pur-KHun ki taraf

sath naqa ke KHuda jaane kidhar ram kar gai

gard-e-mahmil bhi na pahunchi aah majnun ki taraf

jaan-o-dil mein be-tarah bigDi hai tere ishq mein

kijiye dil ki taraf ya jaan-e-mahzun ki taraf

zulf-o-ruKH hai roz-o-shab kya dekhte rahte ho tum

munsifi se Tuk to dekho apne maftun ki taraf

KHizr tak kijo madad tu bhi ki ta bhule na rah

naqa-e-laila chala hai aaj majnun ki taraf

garche hain teri hi gardish se nigah ki hum KHarab

par ishaara is ka kar dete hain gardun ki taraf

kyunki aawe chain tere wahshiyon ko baad-e-marg

KHak ho kar jab talak jawen na hamun ki taraf

nam mein bhi hai ayan aashiq ki aashufta-sari

dekhte to hoge aksar bed-e-majnun ki taraf

bas-ki us ki zulf ke aashufta hain hum ai 'hasan'

sher mein bhi dhyan hai pechida mazmun ki taraf