sab ko is dahr mein aana hai chale jaana hai

sab ko is dahr meñ aanā hai chale jaanā hai

apnā kirdār nibhānā hai chale jaanā hai

zindagī ne jo sikhāyā hameñ lamha lamha

ek lamhe meñ bhulānā hai chale jaanā hai

kis ko mā'lūm hai kab saañs kī lai par ham ko

āḳhirī giit sunānā hai chale jaanā hai

vaqt-e-ruḳhsat ye gila kaisā shikāyat kaisī

kuchh na sunñā na sunānā hai chale jaanā hai

lauT kar aatā nahīñ jis se musāfir koī

sab ko us moḌ pe aanā hai chale jaanā hai

be-ruḳhī ne tirī kyā haal kiyā hai merā

ik nazar tujh ko dikhānā hai chale jaanā hai

āḳhirī lamha mujhe aise bitānā hai 'sifar'

tere pahlū meñ samānā hai chale jaanā hai

sab ko is dahr mein aana hai chale jaana hai

apna kirdar nibhana hai chale jaana hai

zindagi ne jo sikhaya hamein lamha lamha

ek lamhe mein bhulana hai chale jaana hai

kis ko ma'lum hai kab sans ki lai par hum ko

aaKHiri git sunana hai chale jaana hai

waqt-e-ruKHsat ye gila kaisa shikayat kaisi

kuchh na sunna na sunana hai chale jaana hai

lauT kar aata nahin jis se musafir koi

sab ko us moD pe aana hai chale jaana hai

be-ruKHi ne teri kya haal kiya hai mera

ek nazar tujh ko dikhana hai chale jaana hai

aaKHiri lamha mujhe aise bitana hai 'sifar'

tere pahlu mein samana hai chale jaana hai