sab ko KHud se bacha raha hun main

sab ko ḳhud se bachā rahā huuñ maiñ

apnā naqsha miTā rahā huuñ maiñ

dil kā tere havā meñ jān-e-jāñ

purza purza uḌā rahā huuñ maiñ

yā sajātā huuñ terī Dolī yā

apnī mayyat sajā rahā huuñ maiñ

taaki phir she'r kā dhamāka ho

roz bārūd khā rahā huuñ maiñ

dil ke maiñ ne baḌhā.e daam bahut

jaan sastī banā rahā huuñ maiñ

Dhoñg hai ye mirī na.ī ulfat

ab bhī vā'da nibhā rahā huuñ maiñ

baat manhūs ik sunāne ko

pahle achchhī sunā rahā huuñ maiñ

'iid dīvālī ho ki baisākhī

jashn-e-urdu manā rahā huuñ maiñ

tañg aayā haTā ke kāñToñ ko

ab to rastā haTā rahā huuñ maiñ

ab to dete nahīñ ġhulāmī bhī

daur thā ik ḳhudā rahā huuñ maiñ

aag lagne kī chaah se hī to

sham' ghar meñ jalā rahā huuñ maiñ

ab tirā zahr phaile bāhar bhī

ab to 'maġhlūb' jā rahā huuñ maiñ

sab ko KHud se bacha raha hun main

apna naqsha miTa raha hun main

dil ka tere hawa mein jaan-e-jaan

purza purza uDa raha hun main

ya sajata hun teri Doli ya

apni mayyat saja raha hun main

taki phir she'r ka dhamaka ho

roz barud kha raha hun main

dil ke main ne baDhae dam bahut

jaan sasti bana raha hun main

Dhong hai ye meri nai ulfat

ab bhi wa'da nibha raha hun main

baat manhus ek sunane ko

pahle achchhi suna raha hun main

'id diwali ho ki baisakhi

jashn-e-urdu mana raha hun main

tang aaya haTa ke kanTon ko

ab to rasta haTa raha hun main

ab to dete nahin ghulami bhi

daur tha ek KHuda raha hun main

aag lagne ki chah se hi to

sham' ghar mein jala raha hun main

ab tera zahr phaile bahar bhi

ab to 'maghlub' ja raha hun main