sab ko KHwabon ke na aiwan mein rakh

sab ko ḳhvāboñ ke na aivān meñ rakh

maiñ haqīqat huuñ mujhe dhyān meñ rakh

rāhzan phirte haiñ bastī bastī

ghar kā sarmāya bayābān meñ rakh

shab-parastoñ kī hai duniyā pyāre

apne sūraj ko garebān meñ rakh

kyā karegā tū ye muTThī-bhar dhuup

aag siine ke ḳhiyābān meñ rakh

be-sadā qarya-e-ehsās huā

uñgliyāñ ab na yahāñ kaan meñ rakh

kisī dastak kā ujālā na sahī

sham.a yādoñ kī to dālān meñ rakh

farhat-angez hai bāhar kī havā

khiḌkiyāñ zehn ke aivān meñ rakh

hai dar-o-bast-e-ma.ānī in se

malaka lafzoñ kī pahchān meñ rakh

shahr-tā-shahr hai zaḳhmoñ kā paḌāv

apnā ḳhema abhī maidān meñ rakh

ai 'fazā' lai kā ye sho.ala na bujhe

itnā āhang to auzān meñ rakh

sab ko KHwabon ke na aiwan mein rakh

main haqiqat hun mujhe dhyan mein rakh

rahzan phirte hain basti basti

ghar ka sarmaya bayaban mein rakh

shab-paraston ki hai duniya pyare

apne suraj ko gareban mein rakh

kya karega tu ye muTThi-bhar dhup

aag sine ke KHiyaban mein rakh

be-sada qarya-e-ehsas hua

ungliyan ab na yahan kan mein rakh

kisi dastak ka ujala na sahi

shama yaadon ki to dalan mein rakh

farhat-angez hai bahar ki hawa

khiDkiyan zehn ke aiwan mein rakh

hai dar-o-bast-e-maani in se

malaka lafzon ki pahchan mein rakh

shahr-ta-shahr hai zaKHmon ka paDaw

apna KHema abhi maidan mein rakh

ai 'faza' lai ka ye shoala na bujhe

itna aahang to auzan mein rakh