سب کچھ سپرد دشت بلا کر دیا گیا

سب کچھ سپرد دشت بلا کر دیا گیا

اے ساکنان شہر یہ کیا کر دیا گیا

جوش جنوں کو حرف صدا کر دیا گیا

ہم پہ جو قرض تھا وہ ادا کر دیا گیا

پھر یوں ہوا کہ ہم نے دل و جاں لٹا دئے

وعدہ کسی سے تھا سو وفا کر دیا گیا

اس مرگ ناگہاں پہ پرندے ہیں سوگوار

منظر سے کیوں شجر کو جدا کر دیا گیا

جب دشت بے کنار میں خیمے لگا لئے

پھر آندھیوں کو میری سزا کر دیا گیا

جب ہم نے سانس سانس کا تاوان دے دیا

ہم پر در حیات بھی وا کر دیا گیا