sab kuchh sipurd-e-dasht-e-bala kar diya gaya

sab kuchh sipurd-e-dasht-e-balā kar diyā gayā

ai sākinān-e-shahr ye kyā kar diyā gayā

josh-e-junūñ ko harf-e-sadā kar diyā gayā

ham pe jo qarz thā vo adā kar diyā gayā

phir yuuñ huā ki ham ne dil-o-jāñ luTā diye

vā'da kisī se thā so vafā kar diyā gayā

is marg-e-nā-gahāñ pe parinde haiñ sogvār

manzar se kyoñ shajar ko judā kar diyā gayā

jab dasht-e-be-kanār meñ ḳheme lagā liye

phir āñdhiy.oñ ko merī sazā kar diyā gayā

jab ham ne saañs saañs kā tāvān de diyā

ham par dar-e-hayāt bhī vā kar diyā gayā

sab kuchh sipurd-e-dasht-e-bala kar diya gaya

ai sakinan-e-shahr ye kya kar diya gaya

josh-e-junun ko harf-e-sada kar diya gaya

hum pe jo qarz tha wo ada kar diya gaya

phir yun hua ki hum ne dil-o-jaan luTa diye

wa'da kisi se tha so wafa kar diya gaya

is marg-e-na-gahan pe parinde hain sogwar

manzar se kyon shajar ko juda kar diya gaya

jab dasht-e-be-kanar mein KHeme laga liye

phir aandhiyon ko meri saza kar diya gaya

jab hum ne sans sans ka tawan de diya

hum par dar-e-hayat bhi wa kar diya gaya