sab log sham hote hi jab apne ghar gae

sab log shaam hote hī jab apne ghar ga.e

sahrā ko ham bhī shahr se phir lauT kar ga.e

achchhe dinoñ kī aas meñ jaane kidhar ga.e

jitne the mere ḳhvāb suhāne bikhar ga.e

muusā jo ban chale the avāmī ḳhitāb meñ

sāhir kī rassiyoñ se vahī log Dar ga.e

gahrā.ī nāpne meñ the kuchh log munhamik

kuchh log pāniyoñ meñ bilā ḳhauf utar ga.e

ahl-e-junūñ kī jab na rahī chāk-dāmanī

shāhān-e-ḳhush-libās se rishte sañvar ga.e

aisā mujassama thā vo ḳhush-pairahan ki bas

nañge ġharīb bachche vahīñ par Thahar ga.e

ai ḳhāk-e-hind bol ki tū jāntī hai sab

kuchh to batā kahāñ mire la.al-o-gohar ga.e

kahte haiñ un se pahle ye gulshan thā ḳhār-zār

vo kaun log the jo yahāñ se guzar ga.e

jis ke liye ḳhirad ko thī sardār kī talāsh

ahl-e-junūñ vo kaam sar-e-dār kar ga.e

ḳhud apne ehtisāb kī fursat kahāñ milī

kuchh bhī huā to ġhairoñ pe ilzām dhar ga.e

lashkar ko jaan de ke milā bhī to kyā milā

fat.h-o-zafar ke taaj to shāhoñ ke sar ga.e

maiñ ne kahā mutālba koī nahīñ mirā

kahne lage ki aap to bilkul sudhar ga.e

sab log sham hote hi jab apne ghar gae

sahra ko hum bhi shahr se phir lauT kar gae

achchhe dinon ki aas mein jaane kidhar gae

jitne the mere KHwab suhane bikhar gae

musa jo ban chale the awami KHitab mein

sahir ki rassiyon se wahi log Dar gae

gahrai napne mein the kuchh log munhamik

kuchh log paniyon mein bila KHauf utar gae

ahl-e-junun ki jab na rahi chaak-damani

shahan-e-KHush-libas se rishte sanwar gae

aisa mujassama tha wo KHush-pairahan ki bas

nange gharib bachche wahin par Thahar gae

ai KHak-e-hind bol ki tu jaanti hai sab

kuchh to bata kahan mere lal-o-gohar gae

kahte hain un se pahle ye gulshan tha KHar-zar

wo kaun log the jo yahan se guzar gae

jis ke liye KHirad ko thi sardar ki talash

ahl-e-junun wo kaam sar-e-dar kar gae

KHud apne ehtisab ki fursat kahan mili

kuchh bhi hua to ghairon pe ilzam dhar gae

lashkar ko jaan de ke mila bhi to kya mila

fath-o-zafar ke taj to shahon ke sar gae

main ne kaha mutalba koi nahin mera

kahne lage ki aap to bilkul sudhar gae